aus: Vertell mui watt 2004, Nr. 232

Die folgenden Dönekes und Vertellekes stammen allesamt – bis auf die Erzählung „Dat Friggen“ – aus dem kleinen Buch „Et lut säu gutt dat Küörter Platt“, das weiterhin bei den Heimatfreunden Bad Westernkotten zu beziehen ist. W. Marcus

Dä Pastäuer hiät et nich oinfach

Et jedem recht ti maken is ne gräute Kunst! – Wann dä Pastäuer met dä hoiligen Misse pünktlik anfänget, dann sägget dä Luie: Suine Iuher goiht vüär. Hiät hoi sick owwer moal en bitzken verlatet, lätt hoi dä Luie unnütz wachten.

Priäget hoi fuif Miniuten üäwer de Tuit, is hoi en Kuierkopp. Priäget hoi wenniger, dann woit hoi nix.

Schallt suine Woare harre dür dä Kiärke, dann is hoi en Schriggert. Kuiert hoi normal, dann verstoiht me nix.

Wann hoi sick im Bichtstäuhl Tuid niemet dann hält hoi dä Sünner ti lange faste. Mäket hoi et koart, dann is hoi en schlechten Bichtvatter.

Wann hoi oin oigen Auto hiät, is hoi weltlik gesinnt. Hiät hoi koint, dann is hoi oltfränksk.

Wann hoi suine Schöpkes besöcht, is hoi niggelik un kieket in de Pötte. Wann hoi Hiusbesuche maket, dann is hoi soin Liäwen nit in dä Pastroate antidroipen. Sittet hoi im Hiuse, dann is hoi wahne bequem.

Kuiert hoi van Pennigen un Moneten, dann is hoi ächtert Geld hiär. Mäcket hoi en Gemeindefest, dann trecket hoi diän Luien dat Geld iut dä Tasken. Owwer mäket hoi koin Fest, dann is nix loss in’e Gemoinde.

Krich dä Kiärke en niggen Anstrich, dann schmitt hoi et Geld düär’t Finster. Lätt hoi owwer niks maken, dann lätt hoi allet verschloddern.

Is hoi jung, dann hiät hoi koine Erfahrunge, is hoi olt, sall hoi sick doach endlik täu Rugge setten.

Un wann hoi oinet Dages däut goiht, wat gifft et dann? – Dann is koiner do, de iärne ersetten kann!

Dä Pastäuer un dä Schöäper

Dä Pastäuer har in suiner Sunndags-Priärge wuier wahne losdunnert. Duiwel un Hölle mochten hiärhollen, ümme dä Gemoinde in’t Gewissen täu kuiern.

No dä Misse droip dä Pastäuer diän Schöäper. Hoi froggere iährne:“Wie hiärt dui muine Priärge gefallen?“- „Och, Häer Pastäur,“ sagg dä Schöäper, „Wann diu duinen Duiwel nit häerst un ick nit muine Ruiens, wui kroigen dä Schoape nit buinanner!“

Dat Friggen

Von Hans Röttger, Rektor a.D., Meschede [aus einem ungeordneten Bestand im Archiv der Heimatfreunde, in Westernkötter Platt übertragen von Paula Maerthen und Wolfgang Marcus.]

Schulten Fieneken frogere oines Dages iährn Vatter: „Säch mol, Vatter, ick sin jo niu äuk in diän Joahrn, bo man sick verfrigget. Wat moinst Diu do täu?“ Schulten Vatter nickere: „Jo, Fieneken, dann frigg ment.“ Fieneken harre owwer Suargen:“Jo, säch, dat dä ick jo ganz gäerne, owwer hoi is man jünger äh ick“ De Vatter nickere wuier:“Jo, dann frigg loiwer nit!“ De Dochter is domet owwer nit tifriärn:“Jo, gewiss, diu hiärst Recht. Owwer, wann ick niu gar nit frigge, dann kumm ick jo nie in biätere Ümmestänne. Un dat woll ick doch mol säu gäerne.“

De Vatter nickere:“Jäu gewiß, dann frigg.“ Owwer Fieneken harr nigge Bedenken:“Jo, Vatter, schännen däut hoi wuahl manges, wenn hoi mui bläus nit schlött!“ De Vatter nickere:“Dat kann me vürhiär jo nit wieten, owwer dann frigg loiwer nit.“ – Wuier kümmet Fieneken nen niggen Gedanken:“Jo, recht hiärst de, Vatter. Owwer wenn ick niu nit frigge, dann stoiht me, wenn me old is, säu alloine inne Welt un wiärt dann ment säu rümmestuffelt.“ De Vatter nickere:“ Jo, sieker, dann frigg doch ment loiwer.“

Owwer Fieneken hiät näu annere Angest:“Jo Vatter, dat dä ick dann jo äuck wuahl. Ick möchte owwer doch gäerne all wieten, op hoi mui äuk trui blifft. Ick möchte niu all wieten, op hoi vlichte met der ollen Krämersken oder met em annern Duier iut usem Duarpe später mol dürgenk.“

Langsam was Schulten Vatter niu boise:“Dann frigg loiwer nit und lot de Finger dowiäg.“ Niu kruig Fineken dat Jaulen:“Owwer Vatter, ick wöll duarch ganz gäern mol friggen!“ Do langere et Schulten Vatter. Hoi högget met de Fiust op’en Disk:“In droi Duiwels Noamen! Frigg odder frigg nit, owwer lot mui domet in Rugge!“

Dat Luork im Trummelfell

Opa Linnemann was im oisten Weltkruig bui de Musikkapelle, hoi was Trummler. Jede Wiärke har hoi oin Fell kuort trummelt. Niu moch hui wuier Meldung maken. „Herr Leutnant, muin Trummelfell is a wuier kuort.“ – „Linnemann, eins bekommen sie noch, dann ziehe ich Ihnen das Fell vom Hintern!“ – „Täum Befehl, Herr Leutnant, owwer do is äuck a oin Luork inne.“